🪴उम्मीद पे दुनिया🪴 📍मन शुद्धीची पेरणी : डॉ. इंद्रजित देशमुख

🪴उम्मीद पे दुनिया🪴
📍मन शुद्धीची पेरणी : डॉ. इंद्रजित देशमुख

🎯संदर्भ : ॲग्रोवन वृत्तसेवा :
✒️संकलन : प्रविण सरवदे, कराड,
〰️〰️〰️〰️〰️〰️〰️〰️〰️
आपल्या मनाच्या आत अनेक शक्ती लपलेल्या आहेत. त्यांना समजून घेतले तर आपण समाधानाने जगू अशीच एक मनाची शक्ती आहे आशावादाची, आपलं जगणंच सतत आशावादाच्या छायेत सुरू असतं. मनात कोणत्या ना कोणत्या गोष्टीचा आशावाद असतोच या सोबत करणाऱ्या आशेवरच माणूस जगत असतो एखादी गोष्ट मिळालीच पाहिजे हा अट्टहास म्हणजे अपेक्षा आणि एखादी गोष्ट नक्की मिळेल असा विश्वास असणे ही आशा, अपेक्षांच्या ओझ्यांनी दुःख वाट्याला येते तर आशा जगायला आधार देते.

कोणाला संपत्तीची, कोणास प्रतिष्ठेची, आरामाची, शक्तीची, तर कोणास सौंदर्याची, समृद्धीची, बुद्धीची आशा असते. छोटी मोठी आशा प्रत्येकाच्या मनात सातत्याने असतेच. आता नाही तर आज, आज नाहीतर उद्या, उद्या नाहीतर परवा भविष्यात केव्हा ना केव्हा ही गोष्ट मिळेलच या आशेच्या बळावर आपण मार्गक्रमण करीत राहतो. ही आशा कभी पूर्ण होईल किंवा नाही हे काळ व प्रयत्न ठरवतात. परंतु मन मात्र तिच्या बळावरच आयुष्याला पुढे नेत असते. या आशेचा ऑक्सिजन घेतच मन प्रफुल्लित राहत असते. जगण्याची उमेद देणारी आशाच मनाची ताकद टिकवून ठेवते. मनाच्या टॉनिक सारखे काम करते, म्हणतात ना, “उम्मीद पे दुनिया कायम है।”

दवाखान्यात ॲडमिट असणारा रुग्ण वेदनांनी, भयाने ग्रस्त असला तरीही, आपण डॉक्टरांच्या उपचाराने बरे होऊ ही आशा, मनात ठेवूनच आजाराला सामोरे जात असतो व बरा होतो. एखाद्या भव्य शोरूम मध्ये ठेवलेल्या चारचाकीकडे बघत जाणारा एखादा त्याच्याही मनात येतं की, आपणही कधीतरी गाडी घेऊ. वितुष्टाने दूर लोटलेले आप्त गित्र कधी ना कधी जवळ येतील, याची आशा मनात असेल तर पुन्हा जवळीकतेचा आनंद लुटता येऊ शकतो. सकाळी उठल्यानंतर आजचा माझा दिवस चांगला जाईल, ही आशा घेऊन दिवसाला सुरुवात करणं, शुभ दिनाला आमंत्रित करणारेच असते.

सातत्याने सराव करून देखील अपयशी ठरणारा एखादा खेळाडू आपणांस कधीतरी यश मिळणारचं याच आशेवर प्रयत्न करीत असतो. हजार वेळा अपयश आले तरीही एखादा संशोधक एखादा प्रयोग यशस्वी होईलच याच आशेवर तर प्रयोगशील राहतो. म्हणजेच आपल्या मनातील आशा यशापर्यंत पोहोचण्यासाठी तग धरून ठेवायला प्रवृत्त करते. संयमाला मदत करते. माझ्या बुद्धीच्या व कष्टाच्या जोरावर मी कधी ना कधी यशस्वी होण्याची आशा ठेवली तरच त्या मार्गान जाऊ. हवी ती गोष्ट आज ना उद्या नक्की मिळणार आहे हे सांगणार आशा नावाचे अमृत जगण्याला उभारी देणारे आहे.

मनात निर्माण होणाऱ्या आशेला काही विशिष्ट काळ नाही. आज ती आहे उद्या नाही, असे कधी होत नाही. काळ बदलला ध्येय बदलले तरी आशा नेहमी सोबतीला असतेच, तीच आपणास जगण्याची प्रेरणा देते.
“चाँद तारो को छूने की आशा, आसमानों में उडने की आशा,”
उंच आकाशात उडण्याची प्रेरणा देते. भविष्यकाळ जगण्याची उम्मीद देते. आशेचे आमच्यावर अनंत उपकार आहेत.

माणूस आशेवर जगत असला तरी याचा अर्थ असा नव्हे की, फक्त आशेवरच जगत राहायचे, कोणतेही काम करायचे नाही किंवा हवी ती गोष्ट मिळविण्यासाठी प्रयत्न करायचे नाहीत. मनातील आशावाद जागृत ठेवत आपले कर्म करीत राहणे व इच्छित बाब मिळवणे हेच महत्त्वाचे !

निराशेतून आशेचा किरण शोधत नकारात्मक मनाला सकारात्मकतेत परिवर्तित करणे हाच मार्ग संतांनी दाखविला. अनेक हालअपेष्टा उपहास, मानहानी सहन करून देखील दुरितांचे तिमिर जाण्यासाठी “जो जे वांछिल तो ते लाहो” म्हणत माउली पसायदान मागतात. दुःख पर्वताएवढे म्हणणारे तुकोबाराय ‘विठू भक्तीचा डागोरा। कळी काळासी दरारा। म्हणत संकटांवर, दुर्दैवी प्रसंगांवर स्वार होतात. मनाला दृढ विश्वास देणारी आशाच जगण्याचा भरवसा देते असे नामदेवराय सांगतात.

नामा म्हणे मज आहे भरवसा । मना तू विश्वास दृढ करी।।
या आशारूपाला वरदानाला सतत तेवत ठेवत सकारात्मक बनत यशाचे टप्पे गाठता येतील. उदास, खिन्न मनाला आशाच उभारी देऊ शकते. म्हणूनच या आशेला जपत प्रयत्नपूर्वक कष्ट करीत इच्छिताची प्राप्ती करण्यात प्रत्येकास यश मिळो. मनाला धीर धरण्याची ताकद देत राहो. आशेची ही अमृतधारा हरेकाच्या मनात वाहत राहो.

जय हो मंगल हो..!